Культуру трэба везці ў вёску, а Інтэрнэт не канкурэнт бібліятэцы – у Маладзечне прайшла калегія Мінкульта (ФОТА)

Выніковая калегія прайшла перад цырымоніяй перадачы Маладзечну статуса культурнай сталіцы Беларусі 2016 года. На яе прыехалі дэлегацыі з абласцей Беларусі і Мінска, прысутнічала намеснік прэм'ер-міністра Рэспублікі Беларусь Наталля Качанава.

Міністр культуры Барыс Святлоў на пачатку пасяджэння зачытаў 40-хвілінную справаздачу аб выніках дзейнасці Міністэрства ў 2015 годзе і праблемах развіцця культуры ў 2016-м, які аб'яўлены ў краіне Годам культуры.

У тым ліку Барыс Святлоў казаў аб праблемах з культурным выхаваннем, якія сёння існуюць на вёсцы, і пра тое, што Інтэрнэт не павінен быць канкурэнтам бібліятэцы. Міністр адзначыў:

– На працягу 2012-2015 гадоў з-за міграцыі людзей з вёскі ў горад мы згубілі частку гледачоў, чытачоў, аматараў мастацтва. У нас зніжаецца колькасць наведнікаў бібліятэк, падае цікавасць да кніжнай формы падачы інфармацыі. Інтэрнэт не павінен быць канкурэнтам бібліятэцы. Мясцовыя ўлады павінны за сродкі мясцовага бюджэта і сродкі спонсараў забяспечыць бібліятэкі камп'ютэрамі і Інтэрнэтам. Трэба шукаць шляхі павышэння наведванняў бібліятэк.

Міністр культуры Барыс Святлоў

Звярнуў увагу Барыс Святлоў таксама на тое, што ў Беларусі не толькі сталі менш чытаць, але і з кінавытворчасцю ёсць праблемы. Кінастудыя «Беларусьфільм» на сённяшні дзень – стратнае прадпрыемства.

– «Беларусьфільм» знаходзіцца ў творчым заняпадзе, – адзначыў міністр. – У работнікаў кінастудыі застаюцца старыя ўяўленні аб кінавытворчасці, арыентаваныя на бюджэтныя грошы. Наша задача – у першым паўгоддзі выйсці на бясстратную дзейнасць «Беларусьфільма».

Праблему недастатковага культурнага выхавання жыхароў вёсак узняла дырэктар дзяржаўнай установы «Мінскі абласны цэнтр народнай творчасці» Раіса Вайцяхоўская.

Дырэктар Мінскага абласнога цэнтра народнай творчасці Раіса Вайцяхоўская

Па яе меркаванні, мясцовыя ўлады павінны развіваць мабільныя перасоўныя ўстановы культуры. Гэта значыць, культуру трэба везці ў вёску на аўтобусе.

– У раёнах павінны працаваць аўтаклубы, якія прывязуць у вёскі творчыя калектывы, кнігі і музейныя экспанаты, – сказала Раіса Вайцяхоўская.

Дырэктар Мінскага абласнога цэнтра народнай творчасці ў сваёй прамове згадала Маладзечанскі раён. Яна адзначыла, што ўстановы культуры Маладзечаншчыны ў 2015 годзе аказалі насельніцтву паслуг на суму 4 млрд рублеў.

Сярод асноўных задач, якія ставяцца Міністэрствам на 2016 год, міністр Барыс Святлоў адзначыў, што трэба надаць вялікую ўвагу 75-й гадавіне пачатку Вялікай Айчыннай вайны і 30-й гадавіне аварыі на Чарнобыльскай атамнай электрастанцыі.

Усе навіны аб тым, што Маладзечна – культурная сталіца Беларусі ў 2016 годзе, можна прачытаць ТУТ.

Сяргей ЗЯНЬКО
Фота Міхаіла МАРЖЭЎСКАГА