Багач у Вязынцы сёлета будуць святкаваць 24 верасня
Студэнцкае этнаграфічнае таварыства і Дзяржаўны літаратурны музей Янкі Купалы зноў ладзяць у Вязынцы Маладзечанскага раёна Багач. Сёлета свята адбудзецца 24 верасня, пачатак а 13-й гадзіне.
У народным календары Багач прымеркаваны да заканчэння збору ўраджая (“к гэтаму часу ў кожнага ўсяго багата”) і першаму запальванню хатняга агменю – васковай свечкі ў лубцы з жытам, якую ставяць на покуць і захоўваюць там на працягу ўсяго года. Гэта прыносіць у дом багацце і шчасце. Абрад скіраваны на захаванне дабрабыту, ураджайнасці, плоднасці жывёлы, сямейнага ладу, нагадвае Студэнцкае этнаграфічнае таварыства ў сваёй суполцы УКантакце.
Асноўнай дзеяй свята з'яўляецца ссыпанне агульнага Багача, таму ўсіх гасцей традыцыйна просяць захапіць з сабой па жменьцы зерня.
У гэтым годзе ўрачыстыя дажынкавыя песні выканаюць гурты «Рутвіца», «Мярэжа», «Горынь», «Дайнава», а танцавальную вечарынку зладзяць музыкі і танцоры клуба традыцыйнага танца «Сіта». Акрамя таго, на свяце будзе працаваць дзіцячая пляцоўка з рознымі радасцямі. Як заўжды, будзе дзейнічаць традыцыйная кухня і кірмаш.
Як Багач адзначалі ў Вязынцы летась, можна паглядзець ТУТ, пазалетась – ТУТ.
Святкаваць Багач будуць таксама 17 верасня ў Плябані Маладзечанскага раёна.
Паводле старонкі Студэнцкага этнаграфічнага таварыства УКантакце
Нашли ошибку в тексте? Выделите ее и нажмите Ctrl + Enter
Читайте также
